Ең алдымен, «Қазақстан Республикасының кейбір Конституциялық заңдарына мемлекеттік биліктің тармақтары арасында өкілеттіктерді қайта бөлу мәселелері бойынша өзгерістер мен толықтырулар енгізу туралы» Конституциялық заңның жобасы мен «Қазақстан Республикасының кейбір заңнамалық актілеріне мемлекеттік биліктің тармақтары арасында өкілеттіктерді қайта бөлу мәселелері бойынша өзгерістер мен толықтырулар енгізу туралы» заң жобасы бойынша баяндама жасаған палатаның, Заңнама және сот-құқықтық реформа комитетінің төрағасы Нұрлан Әбдіров аталған заң жобалары Елбасының 2017 жылғы 25 қаңтардағы Үндеуінде көрсетілген тапсырмасын орындау мақсатында әзірленгенін, олардың саяси жүйені демократияландыру, атқарушы билік органдарының жауапкершілігі мен тиімділігін арттыру мақсатын көздейтіндігін атап өтті.
Әділет министрі Марат Бекетаев Қазақстан азаматтарының шет елдерде жеке, отбасылық және іскерлік мүдделерін құқықтық қорғауды жетілдіру бойынша Мемлекет басшысының тапсырмасын іске асыру мақсатында дайындалған заң жобасы – «Халықаралық жеке құқық жөніндегі Гаага конференциясы Жарғысын ратификациялау туралы» баяндады. Бұл құжат Халықаралық жеке құқық жөніндегі Гаага конференциясының жұмысына қатысуды ұсынады. Ал аталған ұйымға әлемнің 81 мемлекеті мен Еуропалық одақ кіреді.
«Бұл ұйымның мақсаты – халықаралық жеке құқық нормаларын біріздендіру және осы саладағы мемлекеттердің ынтымақтастығына жәрдем көрсету болып табылады. Негізінен, Гаага конференциясының аясында 39 конвенция жасалған болса, олардың барлығы да азаматтық іс жүргізу шеңберінде құқықтық көмек көрсетуге бағытталған», – деді баяндамашы.
Сондай-ақ, министрдің айтуынша, Қазақстанның Гаага конференциясындағы халықаралық заң шығарушылық жұмысына тікелей қатысып, шет елде біздің азаматтарымыздың құқықтары неғұрлым тиімді қорғалуын қамтамасыз етеді. Сонымен қатар, бұл ұйымға мүшелік Гаага конференциясының саясатын белгілейтін Кеңестің жұмысына қатысуына да мүмкіндік береді. Жалпы істер және саясат бойынша Кеңес отырысы жыл сайын Тұрақты бюро арқылы ұйымдастырылады.
Осылайша, халықаралық шеңберде атқарылатын шаруаға қатысты жан-жақты түсінік берген баяндамашыға депутаттар тарапынан сауалдар да қойылды. Соның бірі – конференция құрамында Қазақстан атынан әрекет ететін мүдделі мекеме туралы болатын. Оған Әділет министрі былай деп жауап берді: «Конференция мүшелері мен Тұрақты бюро арасындағы өзара іс-қимылға жәрдемдесу мақсатында әрбір мүше мемлекеттің үкіметі – ұлттық органдары және әрбір мүше ұйым байланыс жасайтын органды тағайындайды. Біз бұл міндетті атқаруға Әділет министрлігін ұсынып отырмыз. Әрине, оны әлі де нақтылай түсеміз», – деді М.Бекетаев.
Мәжіліс комитеттерінің оң бағасына ие болған аталған Жарғы жалпы отырысқа қатысқан 105 депутаттың тарапынан бірауыздан мақұлданды.
Екінші оқылымда күн тәртібіне шығарылған негізгі баяндаманың бірі – «Қазақстан Республикасының кейбір заңнамалық актілеріне дене шынықтыру және спорт мәселелері бойынша өзгерістер мен толықтырулар енгізу туралы» заң жобасына арналды. Бұл жөнінде баяндаған Мәжілістің Әлеуметтік-мәдени даму комитетінің мүшесі Наталья Жұмаділдаева заң жобасы дене шынықтыру мен спортты қаржыландырудың қолданыстағы жүйесін жетілдіру мақсатында әзірленгенін айтты.
Заң жобасының таныстырылымына дейін жұмыс тобының 7 отырысы өтіп, оған тиісті сала мамандары мен қоғамдық бірлестіктердің және үкіметтік емес ұйымдардың өкілдері қатысқан. Депутаттар тарапынан 70-ке жуық ұсыныс түсіп, олар бойынша тиісті шешімдер қабылданған дене шынықтыру және спорт мәселелері бойынша түзетулерге арналған заң жобасы осылайша екінші оқылымда мақұлданды.
Сонымен қатар, депутаттар жер қатынастарын реттеуге байланысты заң жобасын жұмысқа қабылдап, қылмыстық-атқару заңнамасын жетілдіру мәселелеріне арналған заң жобасы бойынша Сенат енгізген өзгерістерге келісім берді.
Нұрлыбек ДОСЫБАЙ,
«Егемен Қазақстан»