Қазақ эстрада әншісі Димаш Құдайбергеннің атағы әлемдік деңгейде шыға бастағанын дәлелдейтін ақпарат жария болды. «Бұл фотошоп емес! Бұл әлемнің ең жарқын қалаларының бірі Нью-Йорк қаласы, Тайм Сквердегі ең үлкен басты лэд-дисплей! 101 FM радио медиа орталығы танымал жұлдыздар арасында осындай құрметке ие болу үшін бәйге жариялаған болатын. Қазақ баласының әлемдік жанкүйерлері, Dears-тың ықпалымен дауыс беру арқылы Американың төрінде Димаш Құдайбергеннің суреті миллиондарға жария болды! Түрлі ұлт-өкілдер, Тайм Сквердің көпшілігі енді осынау басты экраннан Қазақ әншісін тани алады!» деп жазды (орфографиясы сақталды) Димаштың продюсері Алпамыс Шәрімов өзінің әлеуметтік желідегі парақшасында.
Таймс-сквер – Нью-Йорк қаласының тарихи орталығы Манхэттендегі Бродвей мен Жетінші авеню қиылысындағы алаң. Қаладағы Театрлар кварталының орталығы. Алаң 1904 жылы «Нью-Йорк Таймс» газеті Times Building ғимаратына көшіп келгеннен кейін осындай атауға ие болды. Таймс-сквер бүгінде әлемдегі адамдар ең көп тамашалайтын орындардың бірі. Ол жерге жылына 50 млн-дай адам келеді. Алаңнан күніне 300 мыңнан аса жүргінші, 115 мың жүргізуші мен жолаушы өтеді. Бұл жерде 170 мыңдай адам жұмыс істейді.
Таймс-сквер Нью-Йорктың ғана емес, АҚШ –тың символы болып саналады.