Іс-шараның ашылу салтанатына мемлекет және қоғам қайраткерлері Оралбай Әбдікәрімов, Жақсылық Садықов, Қарағанды облысы әкімінің орынбасары Ораз Тәуірбеков, медициналық қоғамдастық пен ғылыми ұйымдардың өкілдері қатысты. Қатысушылар алдында Қазақ нейрохирургтер қауымдастығының президенті, «Ұлттық нейрохирургия орталығы» АҚ басқарма төрағасы, академик Серік Ақшолақов құттықтау сөз сөйледі. Ол өз сөзінде ел Тәуелсіздігінің 35 жылдығы қарсаңында конгресс өткізу ерекше рәміздік мәнге ие екенін, егемен елдің даму жылдарындағы отандық нейрохирургияның жетістіктерін атап өтті.
«Тәуелсіздіктің 35 жылы – мемлекеттің ғана емес, сонымен бірге отандық нейрохирургияның қалыптасу және даму тарихы. Осы уақыт ішінде сала мамандандырылған қызмет құру кезеңінен жоғары технологиялық медициналық көмекті енгізіп, халықаралық деңгейге шығуға дейінгі үлкен жолдан өтті. Елімізде заманауи медициналық инфрақұрылым қалыптасты, жоғары технологиялық орталықтар ашылды. Соның жарқын мысалы – Ұлттық нейрохирургия орталығы. Осыдан он сегіз жыл бұрын ашылған орталық бүгінде әлемге жоғары технологиялар мен ғылым тоғысқан, білікті мамандар даярлайтын жетекші мекеме ретінде танымал. Кейінгі жылдары елімізде халықаралық деңгейдегі ірі нейрохирургиялық іс-шаралардың өтуі – отандық медицинаның әлеуетін көресетеді», деді С.Ақшолақов.
С.Ақшолақовтың айтуынша, бұған дейін нейрохирургтердің Х Азиялық конгресі, Нейрохирургиялық қоғамдардың Бүкіләлемдік Федерациясының (WFNS) білім курстары, Еуропалық нейрохирургиялық қоғамдар федерациясының (EANS) білім курстары, сондай-ақ Уолтер Э.Денди атындағы Америкалық нейрохирургия қауымдастығының X дүниежүзілік конгресі елімізде жоғары деңгейде ұйымдастырылған.
«Конгресс – қауымдастықтың маңызды алаңы. Бұл алаңда жетістіктерімізбен қатар, әлі де шешімін табуға тиіс мәселелер ашық талқыланады. Күрделі клиникалық жағдайлар жөнінде тәжірибе алмасып, еліміздің әр өңіріндегі нейрохирургиялық қызметтің дамуын саралап, пікір бөлісеміз», деді С.Ақшолақов.
Форум жұмысына еліміздің барлық өңірінен 200-ге жуық делегат қатысты. Екі күн ішінде конгреске қатысушылар заманауи нейрохирургияның ең өзекті мәселелеріне арналған 53-тен астам ғылыми баяндама оқыды. Инновациялық нейрохирургиялық тәсілдер, жүйке жүйесінің ауруларын диагностикалау мен емдеуде жоғары технологияларды қолдану, күрделі тамырлы, онкологиялық патологияларды емдеу, ересектер мен балалардағы эпилепсия, сондай-ақ функционалды және балалар нейрохирургиясының жаңа бағыттары туралы жан-жақты сөз болды.
Ғылыми бағдарламаға пленарлық, секциялық отырыстар, кәсіби пікірталастар, шеберлік сабақтары, симуляциялық тренингтер, практикалық дәрістер кірді. Мамандар күрделі клиникалық жағдайларды жүргізу жөнінде тәжірибе алмасып, еліміздің нейрохирургиялық қызметін одан әрі дамыту келешегін талқылады. Конгресс аясында мамандарды қолдау мақсатында жас ғалымдар байқауы өтті, оның барысында резиденттер мен жас нейрохирург дәрігерлердің ауызша баяндамалары ұсынылды. Байқау қорытындысында академик Серік Ақшолақов атындағы сыйлықтың екі жеңімпазы анықталды. Бұл марапат жыл сайын С.Ж.Асфендияров атындағы Қазақ ұлттық медицина университеті мен Ұлттық нейрохирургия орталығының оқу, тәжірибелік және ғылыми қызметте ерекше жетістік көрсеткен екі резидентіне беріледі.
Форум барысында кәсіби қоғамдастықтың жетекші өкілдерінің еңбегі атап өтілді. Нейрохирургиялық қызметті дамытуға қосқан елеулі үлесі үшін еліміздің түрлі өңірінен 18 нейрохирург марапатталды.
Тәуелсіздік жылдарында елімізде заманауи нейрохирургиялық қызмет, мамандандырылған орталықтар құрылды, диагностика мен емдеудің ондаған жоғары технологиялық әдісі енгізілді, жергілікті мамандар халықаралық деңгейде танылды. Бүгінде отандық нейрохирургтер әлемдік деңгейдегі күрделі операцияларды сәтті орындап, халықаралық ғылыми жобаларға қатысып, еліміздің атынан әлемнің жетекші кәсіби алаңдарында кәсіби жетістіктерімен танылып жүр.
Жиынды қорытындылаған қатысушылар ғылыми ынтымақтастықты одан әрі дамыту, инновациялық технологияларды қолдану аясын кеңейту, мамандардың жаңа буынын даярлау қажеттігін атап өтті. Сарапшылардың пікірінше, мұндай іс-шаралар медициналық көмектің сапасын арттыруға, кәсіби байланыстарды нығайтуға, нейрохирургияны одан әрі дамытуға ықпал етеді.
Қазақстан нейрохирургтерінің VI конгресі отандық нейрохирургияның ғылыми әлеуеті мен кәсіби бірлігін тағы бір мәрте көрсетті. Мамандар пікірінше, мұндай кездесулер тәжірибе алмасуға ғана емес, саланың алдағы даму бағытын айқындауға да мүмкіндік береді.
