Оқиға осыдан бірер күн бұрын Тараздағы аялдамалардың бірінде болған. Екі ер адам жасөспірімді көлікке күштеп отырғызбақ болған сәтте оқиға орнынан табылған Нүркен Омаров жылдам шешім қабылдап, батыл әрекетке көшеді. Оның осы қадамының арқасында қыз баланың өміріне төнген қауіп сейілді. Облыстық полиция департаментінің мәліметінше, күдіктілер жедел ұсталып, қазір сотқа дейінгі тергеу амалдары жүргізіліп жатыр.
«Жасөспірімнің жүзінен қорқыныш байқаған соң, бір шикіліктің барын бірден сездім. Мен бұл қадамға қандай да бір марапат алу үшін барған жоқпын, мұны азаматтық әрі әкелік борышым деп есептеймін. Бала – біздің болашағымыз, жүрегі бар кез келген ер-азамат осындай жағдайда үнсіз қалмауы керек», дейді Нүркен Омаров.
Өңір басшысы Е.Қарашөкеев қоғам тыныштығына бейжай қарамаған азаматтың бұл әрекетін жоғары бағалады. Н.Омаровтың сын сәтте жауапкершілік танытып, «Заң мен тәртіп» қағидатын берік ұстанғаны өскелең ұрпаққа үлгі екенін атап өтті. Сондай-ақ шаһар тұрғынының әлеуметтік жағдайымен танысқан облыс әкімі оны тұрақты жұмыспен қамту үшін жауапты тұлғаларға нақты тапсырма берді.
ТАРАЗ
