Суретті түсірген – Ерлан ОМАР, «EQ»
Өткен аптада қоғамды елең еткізген оқиға да көптің есінде. Павлодар қаласының 39 жастағы тұрғыны инсульттен көз жұмғаннан кейін, оның жұбайы марқұмның ағзаларын трансплантациялауға келіскен. Ота елордадан келген мамандар тобының қатысуымен жасалған. Бір мезетте жүрек, екі бүйрек, бауыр және көздің қасаң қабықтары мұқтаж жандарға салынды. Қазір пациенттердің жағдайы тұрақты, дәрігерлердің бақылауында, уақтылы ем алып жатыр.
Айта кетерлігі, қасаң қабықты көшіру операциясы Павлодарда алғаш рет жасалған. Бұған дейін мұндай операциялар тек Астана мен Алматы қалаларындағы ғылыми орталықтар деңгейінде жасалатын.
Республикалық трансплантология және жоғары технологиялық медициналық қызметтерді үйлестіру орталығының директоры Айдар Ситқазиновтың айтуынша, бүйрек, бауыр аурулары жиілеп отыр. Бауыр бойынша – гепатиттер, цирроз, фиброздар бар. Жүрекке қатысты да бұрын өткерілген инфекциялық сырқаттар жүрек-қан тамыр жүйесіне асқыну береді. Осындай жағдайларда науқастар үшін жалғыз мүмкіндік – трансплантация, яғни ағза алмастыру.
Қазір күту парағында, балаларды қоса алғанда, 4 500-ден астам пациент тұр. Олардың басым бөлігінде бүйрек қызметі тоқтаған. Қаза болғаннан кейін донор бола алатын жандардың жасы 18 бен 65 аралығында. Дәрігерлердің айтуынша, ағзаларды алу тек марқұмның өзі тірі кезінде берген келісімі мен туыстарының рұқсаты болған жағдайда ғана жүзеге асады. Ал егер адам өмірінде өз органдарын пайдалануға ресми түрде тыйым салса, бұл шешімді ешкім өзгерте алмайды.
Ақпан қан тапсыру айы деп жарияланды: Ақмарал Әлназарова қан доноры болды
