Жобаның авторы әрі бас продюсері Әлия Назарбаева, ұйымдастырушысы «Жандану әлемі» мен Тұңғыш Президент Қорлары болып саналатын еліміздегі ең ауқымды балалар ән байқауында қазылар алқасы жас дарындарға түрлі бағыттағы әндерді айтқызып, дауысы мен вокалдық қабілеттерін сынады. Қазылар алқасының құрамындағы музыкалық продюсер Фарида Ниязова және танымал қазақстандық орындаушы Балжан Бидаш киелі өлкенің жас дарындар арасынан үздік дауыс иесін анықтауда кәсіби пікірлерін білдірді. Сөйтіп Төлеби ауданының орталығы Леңгірдің кішкентай тұрғыны Мейрамбек Шалxарбай байқаудың ақтық кезеңіне жолдама алды. Жобаның тәлімгері Балжан Бидаштың айтуынша, 11 жастағы Мейрамбек сыңғырлаған дауысымен, музыканы мінсіз ұғыну қабілетімен таңғалдырған. Оның ерекше әртістік қабілеті де көпшілікті сүйсіндірді. Жобаның ақтық кезеңінде Түркістан облысының атынан өнер көрсететін Мейрамбек енді күзде еліміздің басқа аймақтарының жеңімпаздарымен «Жұлдызды Арман үйінде» кездеседі.
«Бала дауысы» байқауының ұйымдастырушысы Толғанай Хасеннің айтуынша, суперфиналға дайындалу мақсатында балалар вокал, хореография және әртістік қабілеттерін арттыратын сабақтарға қатысады. Ал 25-27 қазан күндері жобаның ақтық бағдарламаларында өнер көрсетіп, байқауға арнайы жазылған әндерді орындайды. Яғни, әрбір балаға авторлық ән жазылады. Байқаудың соңында 17 финалистің қатысуымен концерт, мюзикл өткізіледі. Ал «Бала дауысы-2019» байқауының жеңімпазы музыкалық оқу орнында білім алуға мүмкіндік беретін грант пен сиқырлы Диснейлендке саяхат жолдамасын ұтып алады.
Түркістан облысы
