Мемлекет 2010 жылдан бері білікті кадрлармен, заманауи емдік және диагностикалық құрылғылармен жабдықталған арнайы пойызды жолға шығарған еді. Былтырға дейін «Денсаулық» пойыздары шалғайдағы 1 052 бекетке барып, 299 мың тұрғынды, соның ішінде 70 мыңнан астам баланы дәрігерлік тексеруден өткізген. Оның сыртында 1,5 миллионға жуық диагностикалық емшара, 4 мың шағын амбулаториялық ота жасалып, 19 телемедициналық кеңес берілген. Сондай-ақ, ақ желеңділер адамдардың бойынан олардың өздері де білмей жүрген 394 мың дертті анықтапты.
Құрамында терапевт, стоматолог, офтальмолог, оториноларинголог, хирург, педиатр, гинеколог, эндоскопист, кардиолог, невропатолог секілді мамандары бар дәрігерлік бригада онкологиялық ауруларды, туберкулез, қант диабеті секілді ауыр сырқаттарды бастапқы сатыда анықтауда үлкен көмегін тигізіп жүр. Мысалы, арнайы жабдықталған зертханаларда қанның құрамындағы қант мөлшері бірнеше секундта анықталады. Науқас жандардың қан және несеп сараптамасы, биохимиялық талдау да шұғыл дайындалады. Мұның бәрі диагнозды дәл әрі тез қоюға мүмкіндік береді.
Екі құрамға бөлінген пойыздың «Саламатты Қазақстаны» биылғы 6 қарашаға дейін орталық, солтүстік, шығыс және батыс аймақтарды араласа, «Денсаулық» құрамы 20 желтоқсанға дейін оңтүстік және батыс аймақтарға барады.
Жолға шыққан 96 күнде «Денсаулық» пойыздары жүзге жуық темір жол стансасының тұрғындарына көмек көрсеткен. Олардың ішінде Қарағанды, Маңғыстау, Шығыс Қазақстан, Атырау, Қызылорда және Павлодар облыстарынан 5193 бала бар.
Дәрігерлерге қаралғандардың жалпы саны – 192 392. Нақтырақ, айтсақ, 157 013 тұрғын диагностикалық тексеруден өтсе, 566 азаматқа амбулатория жағдайында ота жасалған. Маммолог-мамандарға – 873 әйел, тіс дәрігерлеріне – 9949 азамат қаралған.
«Саламатты Қазақстан» медициналық пойызы өткен аптада Шығыс Қазақстан облысындағы сапарын аяқтады. Қазіргі кезде жылжымалы құрам Павлодар өңірін, ал «Денсаулық» пойызы Қызылорда облысын аралап жүр, дейді «Қазақстан темір жолы» ҰК» АҚ «Әлеуметтік жобалар қоры» корпоративтік қорының директоры Ербол Кеңгірбаев.
Қымбат ТОҚТАМҰРАТ,
«Егемен Қазақстан»
