• 19 Қаңтар, 2017

Шымкенттегі шатқалдарды көгалдандыруға университет ұжымы атсалысады

2 мин

оқу үшін

Egemen Qazaqstan

Шымкенттегі шатқалдарды көгалдандыруға университет ұжымы атсалысады. Бұл туралы бүгін М.Әуезов атындағы Оңтүстік Қазақстан Мемлекеттік Университетінде Шымкент қаласының аумағындағы шатқалдарды көгалдандыру» тақырыбында өткен дөңгелек үстел барысында айтылды, деп хабарлады ОҚО әкімінің баспасөз қызметі. Атап айтқанда, облыс әкімінің бастамасымен қолға алынған «Шатқал» бағдарламасының бірінші кезеңін жүзеге асыру үшін аталған жоғары оқу орнының ғалым, профессорларымен талқылау барысында университет ұжымы тарапынан облыс әкіміне 5 гектар жер учаскесін бөлу туралы ұсыныс жасалды. Яғни, оқу орнының студент, оқытушылары арнайы бөлінген жер учаскесін көгалдандырып, абаттандыру жұмыстарын міндетіне алмақ. Жиынға ОҚО Табиғи ресурстар және табиғат пайдалануды реттеу басқармасының басшысы М.Отаршиев, Шымкент қаласы әкімінің орынбасары Б.Жанбосынов, аталған жоғары оқу орнының ректоры Ж.Мырхалықов және университеттің ғалым, профессорлары қатысты. Мұнан бөлек, отырыста М.Әуезов атындағы ОҚМУ ғалымдары «Күрделі рельефті жерлердегі және Шымкенттің ыстық климаты жағдайындағы ландшафтық жобалау», «Қалалық ландшафтарды көгалдандырудың экологиялық аспектілері», «Оңтүстік Қазақстан облысының шатқалдарында өсетін өсімдіктер» және «Ағаш және бұтақ көшеттерін Айкөл ауылындағы 80 гектар жерге өсіру питомнигінің жобасы» тақырыптарында баяндамалар оқып, аталған басқарма басшылығына түрлі ұсыныс, пікірлер жасады. Нақтырақ айтқанда, оқытушылар құрамы «Шатқал» бағдарламасы аясында қола алынған жер учаскелерін абаттандыру ісінде демалыс орындарына тарихи, мәдени ашық мұражай салу, тек ұлттық кинотуындыларымыз көрсетілетін кинотеатр салу сынды ойларымен бөлісті. Пікірлерді мұқият тыңдаған М.Отаршиев жиын соңында М.Әуезов атындағы ОҚМУ ұжымының ұсынысын оң бағалап, бірлесе жұмыс істеуге дайын екенін жеткізді.