Қазақстан алғаш рет Халықаралық валюта қоры мен Дүниежүзілік банктің Көктемгі кездесулерінде жүйелі реформалар күн тәртібін ұсынып, жеке алаң ұйымдастырды, деп жазады Egemen.kz.
Осы күндері Вашингтонда Халықаралық валюта қоры (ХВҚ) мен Дүниежүзілік банк тобының Көктемгі кездесулері өтіп жатыр. Бұл жаһандық экономикалық басқарудың негізгі оқиғаларының бірі. Аталған алаңда әлемдік экономиканың жай-күйі, қаржылық тұрақтылық және даму саясаты талқыланады.
Маңызды оқиғалардың бірі ретінде «Kazakhstan on the Wave of Reforms» атты дөңгелек үстелін атауға болады. Ол алғаш рет Қазақстанның Стратегиялық жоспарлау және реформалар агенттігі тарапынан кездесулер аясында дербес диалог алаңы ретінде ұйымдастырылды.
Айта кетейік, дөңгелек үстел жұмысына Дүниежүзілік банк, Халықаралық валюта қоры және Еуропалық қайта құру және даму банктің жоғары басшылығы қатысты.
Қазақстан Президентінің Кеңесшісі – СЖРА төрағасы Әсет Ерғалиев Қазақстанда жүзеге асырылып жатқан реформалар туралы баяндама жасады. Ол Мемлекет басшысы Қасым-Жомарт Тоқаевтың жаңа ел құруға бағытталған саяси ерік-жігерін ерекше атап өтті.
Мәулен Әшімбаев Тоқаевтың реформалары Қазақстанның «желілік егемендігін» қалай қалыптастыратынын түсіндірді
Осы бағытта ол заманауи сын-қатерлерге жүйелі жауап болып табылатын кешенді конституциялық реформаларды жан-жақты таныстырды. Олардың қатарында технологиялардың, әсіресе жасанды интеллекттің қарқынды дамуы, жаһандық экономиканың терең трансформациясы және халықаралық қаржы ұйымдарымен өзара іс-қимыл мәселелері бар.
Тұрақты экономикалық өсімді қамтамасыз етуге және бәсекеге қабілеттілікті арттыруға бағытталған реформаларға ерекше назар аударылды.
Атап айтқанда, инвесторлар үшін тартымды жағдайлар жасалып жатқаны атап өтілді. Ынталандыру шараларының пакеті қарастырылған, экономикалық маңызы бар жобалар жеке қаралатын Инвестициялық штаб құрылған. Көші-қон саясаты түбегейлі қайта қаралып жатыр. Ол елде қолайлы болу жағдайларын қалыптастыруға бағытталған.
Реформалар мәні-6: Құбылмалы әлемдегі стратегиялық мүмкіндіктер
Негізгі екпін заң үстемдігін қамтамасыз етуге және бизнес үшін әділ, тұрақты әрі түсінікті «ойын ережелерін» қалыптастыруға бағытталған шараларға жасалды.
Әсет Ерғалиев экономиканы либерализациялау шараларына да жеке тоқталды. Олар бәсекелестікті дамытуға, соның ішінде мемлекеттің үлесін қысқарту арқылы, сондай-ақ әкімшілік кедергілерді азайту және реттеуді жеңілдету арқылы бизнес жүргізу жағдайларын жақсартуға бағытталған.
Бұл бағытта Қазақстан цифрлық құралдар мен жасанды интеллект технологияларын белсенді қолдануда. Бірегей ақпараттық жүйе әзірленуде, оны енгізу артық реттеуді жойып, бизнес жүргізу тиімділігін арттырады.
Сондай-ақ цифрлық қаржы құралдарын дамытуға, соның ішінде цифрлық теңгені енгізуге және ақша-несие саясатын жетілдіруге назар аударылды. Бұл құралдардың қаржы жүйесінің тұрақтылығын арттырудағы рөлі атап өтілді.
Сөзін қорытындылай келе, Әсет Ерғалиев Қазақстан кешенді трансформация жүргізіп жатқанын, оның аясында халықаралық қаржы ұйымдарымен ынтымақтастық негізгі бағыттардың бірі екенін ерекше атап өтті.
Өз кезегінде, дөңгелек үстел қатысушылары жүргізіліп жатқан өзгерістердің жүйелі сипатын атап өтіп, реформалардың сапасына назар аударды. Бұл реформалар сенімді нығайтып, ынтымақтастықты одан әрі тереңдетуге ықпал етеді.
Еске сала кетейік, биыл қаңтар айында Әсет Ерғалиев халықаралық қаржы ұйымдарымен байланыс жөніндегі ұлттық үйлестіруші болып тағайындалды.
Қазақстандағы конституциялық реформалар: Елдің саяси жүйесін жаңғырту және халықаралық байланыстардағы рөлі
Өткен тоқсанда бұл бағыттағы жұмыстың жанданғанын байқауға болады. Атап айтқанда, Парламент Серіктестік жөніндегі негіздемелік келісімді ратификациялады, 2026-2031 жылдарға арналған Елдік серіктестік стратегиясы бойынша консультациялар өткізілді, сондай-ақ инвестициялық бастамаларды ілгерілету және уақтылы іске асыруға бағытталған бірқатар келісімдерге қол қойылды.
Осындай дөңгелек үстелді Халықаралық валюта қоры мен Дүниежүзілік банк тобының Көктемгі кездесулері алаңында өткізу елге өзінің реформалар күн тәртібін ішкі үдерістен халықаралық деңгейде мойындалған және қолдау тапқан бағытқа айналдыруға мүмкіндік береді. Бұл жай ғана таныстырылым емес, сенім қалыптастыратын, беделді арттыратын және инвестициялар мен серіктестіктерге, сондай-ақ халықаралық қаржы ұйымдарының құралдарына тікелей қол жеткізуді қамтамасыз ететін қуатты сигнал. Бұл елдің өзін жаһандық экономикада болжамды әрі жауапты қатысушы ретінде бекітуімен түсіндіріледі, ал реформалар тек сыртқы мойындауға ие болып қана қоймай, тұрақты экономикалық өсімге нақты серпін береді.