Еуразия ұлттық университетінің жанынан құрылған мәдени-танымдық бірлестік «Кәусар» клубының ұйымдастыруымен ақын, драматург, Қазақстан Жазушылар одағы басқармасының төрағасы Нұрлан Оразалинмен шығармашылық жүздесу ұйымдастырылды. Салтанатты шараға ақынның ұстаздары, әріптестері мен шығармашылық салада із тастап жүрген іні-қарындастары, сондай-ақ, оқу орнының студент жастары қатысты.
Нұрлан Оразалин өткен ғасырдың 70-жылдары қазақ әдебиетіне өзіндік үнімен келіп, қазақ лирикасының көкжиегін кеңейтіп, сыршыл сезімді жырларымен оқырманын баурап келе жатқан ақын.
Ақынның:
Біздер, қалқам, өлең атты
елденбіз.
Жауыннанбыз,
Қайғыданбыз,
Желденбіз.
Мәңгіліктің үрлеп мәңгі
майданын
Ғасырлардың қойнауынан
енгенбіз.
Кеудемізде – аптап, шілде, май,
тамыз,
Жырларымыз от бүркеді,
байқаңыз.
Қара қылды қақ жаратын қай
кезде
Әділетті байрақ етер тайпамыз, – деп айтатыны да сондықтан. Жыр құдіретін, асыл сөздің салмағын бағамдай білетін ақынның қашанда айтары бөлек емес пе. Осы бір жыр жолдары ақын Нұрлан Оразалиннің әдебиет әлеміндегі өмірлік кредосы іспетті. «Өлең атты елдің» ортасында жүріп отты жырды алаулатып, байрағын асқақ ұстап келе жатқан қаламгердің қай кезде де еңсесі биік. Өйткені, кеңістікке биіктен көз тастайтын ақынның ойлары да озық келеді. Озық ой жырға айналғанда оқырманына ерекше қуат-күш, рух сыйлайды.
Нұрлан Оразалиннің қаламынан ондаған көркем дүниелер туды. Әр жылдарда «Беймаза көңіл», «Көктем көші», «Жетінші құрлық», «Азаматқа аманат», «Құралайдың салқыны», «Ғасырмен қоштасу», «Сырнайлы шақ», т.б. жыр жинақтары мен «Азаматтық айдыны» атты көркем публицистикалық-эссе толғаулар кітабының авторы. Драматург ретінде «Шырақ жанған түн», «Аққұс туралы аңыз» пьесалары орыс, украин, молдаван, қырғыз, өзбек тілдеріне тәржімаланды.
Кездесу барысында, университет студенттері ақынның өлеңдерін жатқа оқып, тыңдарманның құлақ күйін жырмен сусындатты. Жалындай лаулап жыр төккен жастарға қарап, ақынның да шабыты оянып, әр жылдары жазылған елдік, елшілдік, рухани үндестік, баянды махаббат тақырыптарын қаузайтын тәтті шумақтарын шырынын төкпей тыңдармандарына өз үнімен жеткізді.
Жиынның ішкі тәртібі бойынша, қойылған сұрақтарға жауап беру дәстүрін де аттап кеткен жоқ. Басқасын айтпағанда. «Қазақстан Жазушылар одағында мүшелер саны неге көп?», «Сенат депутаты ретінде нендей іс тындырдыңыз?» деген көпшілік сұрағында ақын ағамыз: «Жазушылар одағына 800-ге тарта адам мүшелікке өткен. Бұл көп емес. Тұрғындар саны бізден әлдеқайда аз қырғыз елінде 1500-дей, Өзбекстан, Тәжікстан, Әзербайжанның әрқайсысында 2000-нан артық ресми мүшелікке өткен жазушылары бар», – десе, келесі сұрақтың жауабы ретінде өзі және өзге де әріптестерінің қолдауымен жақын күндері жазушыларға төленетін қаламақы мәселесі шешілетінін, бұл заңды тұрғыда мақұлдану үстінде екенін және оралман қандастарға жедел азаматтық бергізуге де бір кісідей ат салысқанын жеткізді.
Кеш қонақтары атынан жылы лебізін білдіруге шыққан академик-ақсақал Серік Қирабаев шәкірті һәм ізін басқан інісі Нұрлан Мырқасымұлы жайлы: «Бұл заманымен үндескен ақын, қиындыққа, орынсыз сынға күйреп кетпейтін қажырлы қайраткер» деген баға берді.
Соңында шараны ұйымдастырушылар Нұрлан Оразалинді ғылыми кеңестің атынан «Күлтегін» төсбелгісімен марапаттады.
Бекен Қайратұлы, «Егемен Қазақстан»
Суреттерді түсірген
Ерлан ОМАРОВ, «Егемен Қазақстан»