Елімізде мейрамханадағы тағам сапасыз немесе толық піспеген жағдайда, келуші оның ақысын төлеуден бас тарта ала ма? Журналистердің бұл сауалына Тұтынушылардың құқықтарын қорғау комитетінің төрағасы Болат Танабергенов жауап берді, деп жазады Egemen.kz.
Комитет төрағасының айтуынша, мұндай жағдайда тұтынушы алдымен мекеме әкімшілігіне шағымдануы керек. Мәселені ауызша шешуге тырысу қажет, ал келісімге келу мүмкін болмаса, кафе немесе мейрамхана иесіне жазбаша шағым беру керек.
«Егер мәселені ауызша шешу мүмкін болмаса, тапсырыс ақысын бәрібір төлеуге тура келуі ықтимал. Одан кейін жағдайды анықтап, уәкілетті органдарға жүгінуге болады. Егер шағымға жауап берілмесе немесе наразылық туындаса, азаматтар аумақтық сауда және тұтынушылар құқықтарын қорғау департаментіне де жүгіне алады», деді Танабергенов.
Еске сала кетейік, елордада 2026 жылдың алғашқы үш айында тұтынушылардан 3 мыңнан астам өтініш түсіп, олардың нәтижесінде 48,4 млн теңге қайтарылды.
Бұған дейін елімізде сатушылардың үстінен QR-код арқылы шағымдану жүйесі енгізілетінін хабарлаған едік.