Қостанай облысының Жангелдин ауданында браконьерлік жасады деген күдікпен үш адам ұсталды. Полиция олардың автокөлігінен заңдастырылмаған мылтық, жануардың қылшығы жабысқан пышақ тапқан. Сондай-ақ, жақын маңнан оққа ұшып өлген ақбөкеннің денесі табылған, деп жазады Egemen.kz.
Аталған оқиғаға қатысты Қылмыстық кодекстің 339-1-бабы бойынша қылмыстық іс қозғалды.
«Оқиға «Браконьер» республикалық жедел алдын алу іс-шарасы аясында тіркелді. 20 қазаннан 19 қарашаға дейін ел көлемінде өтіп жатқан іс-шара барысында тек Қостанай облысының өзінде 800-ге жуық рейд өткізілді.
Нәтижесінде 150 құқықбұзушылық анықталды, оның 78-і – аңшылық ережесін, 28-і – балық аулау тәртібін бұзуға қатысты. Браконьерлерге қарсы күрес жалғасады. Ал еліміздің табиғи байлығына қол сұққан әрбір адам заң алдында тиісті жазасын алады», деп мәлімдеді облыстық ПД-ның баспасөз қызметі.
Қостанай облысы