Қазақстан Республикасы Премьер-Министрінің бірінші орынбасары Асқар Мамин Сербияның қорғаныс министрі Александр Вулинмен кездесті, деп хабарлады Премьер-Министрдің баспасөз қызметі.
Кездесу барысында Қазақстан мен Сербияның қорғаныс-өнеркәсіп кешені саласындағы екіжақты ынтымақтастығының өзекті мәселелері талқыланды. Тараптар әскери-техникалық ынтымақтастық саласындағы бірлескен жобаларды дамытуға әзір екенін растады.
Асқар Мамин «Сіздің ресми сапарыңыз Қазақстан-Сербия екіжақты қарым-қатынасының дамуына қосымша серпін береді» деп мәлімдей отырып, серіктестікті тереңдете түсу үшін барлық мүмкіндіктердің барын айтты.
Өз кезегінде Сербияның қорғаныс министрі Қазақстанға келген сапарының нәтижелі екенін атап өтті. Сапар барысында әскери-техникалық салада өзара тиімді ынтымақтастықты дамытудың нақты келісімдеріне қол жеткізілді.
Александр Вулиннің басшылығымен Астанаға келген Сербияның қорғаныс министрлігінің делегациясы қорғаныс өнеркәсібі кешенінің нысандарын аралады.