«Таңғажайып Шанхай» деп аталатын қайырымдылық шарасы аясында ЭКСПО-2017 халықаралық көрмесінің музейіне осы шараның 180 жәдігері табысталды. Оған қырыққа тарта мемлекеттің өкілі қатысты. Кездесуде музейдің маңыздылығы, оның қорын экспонаттармен толықтыру жайында айтылды.
Шанхай көрмесі 2010 жылы «Жақсы қала – жақсы өмір» деген тақырыппен өткен болатын. Қазақстан бұл шараға «Астана – Еуразия жүрегі» атауымен қатысты. Шанхай музейі 2010 жылдан бері жұмыс істейді. Аумағы 8 мың шаршы метрден асады.
«Бұл жоба әрбір көрмеден ең үздік деп танылған жұмыстар мен туындыларды бір жерге жинайды. Олардың қатарында ғылыми жобалар, бейнеинсталяциялар бар. Астанада өтіп жатқан ЭКСПО-2017 көрмесінде де таңғаларлық дүниелер жетерлік. Соның біршамасы Қазақстанда қалса, тағы бірқатары музейге табысталады. Экспонаттардың және бір бөлігін қатысушылар елдеріне алып қайтады. Кемінде әр елдің павильонында 6-дан 25-ке тарта экспонат бар», дейді «Астана ЭКСПО-2017» ҰК» АҚ халықаралық қатысушылармен жұмыс департаментінің директоры Ілия Оразақов.