Ол бүгінде «Оңтүстік» өңірлік әскери қолбасшылығының 01731 әскери бөлімінде қызмет етеді. Қызметі – қару-жарақ және радиациялық химия-биологиялық қорғану құралдарын жөндеу шебер-маманы. Он жылға жуық уақыттан бері осы салада қызмет етіп келе жатқан Әсел бүгінде қару-жарақтың «тілін» бес саусағындай біледі. Бұл іске машықтанған ол қорғану құралдарын да өзі жөндей береді. Шынында да қару-жарақтың құпиясын білу, оны меңгеру табандылықпен қатар талантты қажет етеді. Кейде мұндай азаматтардың қабілеті таңданысымызды тудырып та жатады. Дегенмен, әркімнің қарым-қабілеті де өзінің таңдаған мамандығына қарай көрінетін болса керек. Бір қарағанда, әскери сала әсіресе, қыз баласына қол емес болып көрінуі де мүмкін. Бірақ мамандыққа деген құштарлықтың бәрін де жеңетінін Әсел Сауранның тағдырынан көруге болады.
– Әскери бөлімдегі мамандардың көмегімен аз уақытта қару-жарақтың құпиясын меңгеріп шықтым. Бүгінде бұл сала мен үшін аса қиындық тудырмайды. Дегенмен, әскери саланың тәртібі өзгеше. Бұл менің өз қалауыммен таңдаған мамандығым. Сондықтан да темірдей тәртіпті ту еткен әскери өмірге көзқарасым өзгеше, – деген кейіпкеріміз мамандығымен мақтанатынын да жеткізді.
2001 жылы Талас ауданы, Майтөбе ауылынан арман қуып келген Әсел әуелі М.Х.Дулати атындағы Тараз Мемлекеттік университетінің «Жаратылыстану» факультетіне химия-биология мамандығы бойынша оқуға түседі. Қыз балаға тән мамандық алып, білім беру ісімен айналысуды мақсат етеді. Алайда ойламаған жерден оның өмірі өзге арнаға бұрылып сала береді. Университеттің екінші курсын тәмамдаған соң әскери қызметкер Марат Әлімбековке тұрмысқа шығады. Сөйтіп, оның да әскери салаға деген қызығушылығы оянып, ақыры сонда ауысуға тәуекел етеді. Әуелі кітапханашы болған Әсел Сауран кейін әскери тәртіппен Ант қабылдайды. Жылдар өте әскери бөлімде мәдениет үйінің басшысы лауазымына дейін көтеріледі. Бүгінде жоғары нәтижелі жұмысымен көзге түсіп, еліміздің Қорғаныс саласында қалтқысыз қызмет етіп жүрген ол – қару-жарақ жөндеу шебері. Ал жары Марат – сол 01731 әскери бөлімнің оркестрінде аға нұсқаушы.
Қару-жарақ құпиясын білетін қыз бүгінде өзі қызмет етіп жүрген әскери бөлімде абыройға ие маман. Енді тек қана елдің тыныштығын күзетуге еңбек етіп, жоғары нәтижелерге қол жеткізуді мақсат етіп келеді. Ерлермен бірге ел тыныштығы үшін тер төгіп жүрген замандасымыздың әлі де алар асуы алда.
Хамит ЕСАМАН, «Егемен Қазақстан» Жамбыл облысы