Ендігі жерде «Қазақфильм» киностудиясында «Ең сұлу қыз» атты көркем фильмнің түсірілім алдындағы жұмыстары басталды. Бұл картина – режиссер Қанағат Мұстафиннің «16 қыз» комедиялық фильмінің жалғасы. Өткен жылы «16 қыз» фильмі прокатта ең табысты картиналар қатарынан табылған-ды.
Жаңа фильмді Мәдениет және спорт министрлігінің тапсырысы бойынша Ш.Айманов атындағы «Қазақфильм» киностудиясы «Kanaidarproduction» және «Шешенфильм» студиялары түсіретін болады.
Фильмнің сюжеті сүр бойдақ Саматты достарының үйлендірмекші болған шырғалаңына құрылады. Қалыңдық іздеп үлкен қалаға келген жігіттер шым-шытырық оқиғаларға ұрынады.
Қазіргі таңда түсіру тобы реквизиттер дайындап, костюмдер мен локация таңдау үстінде. Сондай-ақ, жуық арада түсіру тобы қосалқы рөлдерге кастинг жарияламақ.
Фильмнің продюсері Айдархан Әділбаев түсіру тобы алғашқы «16 қыз» командасынан қалғанын айтады.
– Бұл топ режиссермен жұмыс істеп, тіл табысып үлгерді. Естеріңізде болса, «16 қызда» бірінші планда Берік Айтжанов айдаған волга «ГАЗ-21» көлігі еді, бұл жолы Мин дәуірінің көне құмырасы болмақ. Бұл фильмде көрермендерді өткір әзілдер және тартымды оқиғалармен байытуға тырыстық».
Қысқасы, жаңа комедияда да көрермендер бұрынғыдай Берік Айтжанов, Аша Матай, Қуаныш Долдаев, Ғани Құлжанов, Саят Мерекенов және Дәурен Айдарқұлов сынды актерлармен қауышады. Жаңа картинаға қосылған жаңа кейіпкерлерді Қарлығаш Мұхаметжанова, Мұрат Бисенбин, Жанна Қуанышева, Фархат Абдрайымов, Асан Мәжит пен Ерболат Тоғызақов сомдайды.
Айнаш Есали,
«Егемен Қазақстан»
АЛМАТЫ