Елордадағы архитектура мен құрылыс саласының дамуына зор үлес қосқан белгілі сәулетші, дарынды басшы, кең жүректі абзал азамат, Мемлекеттік сыйлықтың лауреаты Баир Фарденұлы Досмағамбетов 71-ден асқан шағында дүниеден озды. Бұл – марқұмның отбасы-әулеті, Астана жұртшылығы, әкімдігі мен мәслихаты үшін ауыр қайғы.
Баир Фарденұлы 1954 жылы Алматы қаласында өмірге келіп, қазіргі Абай облысындағы Бақты ауылында шекарашы офицер отбасында өсті. Ол барлық саналы өмірін отандық сәулет саласына арнады. Мәскеудегі сәулет институтын тәмамдағаннан кейін «Қазгорқұрылысжоба» жобалау институтында қарапайым сәулетшіден бастап, шеберхана басшысына дейінгі жолдан өтті. Бұдан соң Қазақ КСР Құрылыс істері жөніндегі мемлекеттік комитетінің Сәулет және қала құрылысы жөніндегі бас басқармасының басшысы болды. Еліміз тәуелсіздік алғаннан кейін Сәулет және құрылыс жөніндегі мемлекеттік комитет төрағасының бірінші орынбасары, Құрылыс, тұрғын үй және аумақтарды дамыту министрінің бірінші орынбасары және Төтенше жағдайлар жөніндегі мемлекеттік комитеті төрағасының орынбасары секілді жауапты қызметтерді атқарды.
Баир Фарденұлы ел астанасын Алматыдан Арқа төріне көшіруге айрықша үлес қосты. 1995 жылы ол жоғары және орталық мемлекеттік органдарын Ақмола қаласына көшіру жөніндегі Мемлекеттік комиссия төрағасының орынбасары, кейін бірінші орынбасары – Комиссия аппаратының басшысы лауазымына тағайындалып, осы жауапты қызметті 1998 жылға дейін атқарды. Ал 1998–2000 жылдары – Астананың бас сәулетшісі, елордалық сәулет және қала құрылысы департаментінің директоры болды. Оның басшылығымен жас астана бас жоспарының үздік идеясына арналған халықаралық сәулет конкурсы ұйымдастырылды. Сондай-ақ оның ұсынысымен «Астанагенплан» жобалау институтын құру туралы шешім қабылдады. Баир Фарденұлы бұл институтты 2000 жылдан бастап, 2015 жылға дейін басқарды. Ол кез келген жұмысты шығармашылық көзқараспен атқарып үлкен беделге ие болды. Білікті сәулетшінің тікелей қатысуымен Астананың бас жоспары мен түзетуі, елорданы және оның агломерация аймағын дамытуға арналған қала құрылысы құжаттамасы әзірленді. Елорданың келбетін айшықтайтын, көрікті нысандарға айналған бірнеше сәулет байқауы өткізілді. Мемлекет тарапынан еңбегі де жоғары бағаланды. «Ерен еңбегі үшін» медалі мен «Құрмет» орденін алды. 2008 жылы «Дөңгелек алаң» сәулеттік кешені үшін Мемлекеттік сыйлықтың лауреаты атанды.
Шын мәнінде, Баир Фарденұлының есімі еліміздегі сәулет өнері мен жас елорданың қалыптасу тарихына алтын әріппен жазылды. Айтулы азамат отбасында сүйікті жары мен балаларына қамқор отағасы болды. Оның ізгі ниетті, зиялы, адамгершілігі мол қасиетін ұмытпаймыз. Баир Фарденұлының маңдай тері, сәулет саласындағы кәсіби бастамалары елорда ғимараттары мен даңғылдарында сәулетшінің өзіне орнатылған ескерткіштей асқақтайтыны шүбәсіз.
Табиғат ЗЕЙНҰЛҚАБДЕН,
Астана қаласы мәслихатының төрағасы